دائمًا لما نفكر في وجهة سفر تجمع بين التاريخ، الحداثة، والأجواء الحلوة اللي ما تنمل منها، لندن تطلع أول اسم في البال! مدينة نابضة بالحياة، تمزج بين العراقة والعصرية، وكل زاوية فيها تحكي قصة.
ليش لندن؟
لأنها من المدن اللي تقدر تستمتع فيها سواء كانت رحلتك قصيرة أو طويلة، فيها كل شيء لكل الأذواق، من معالم تاريخية لأماكن تسوق، من كافيهات رايقة لمطاعم عالمية. والأجمل؟ إنها مدينة سهلة، المواصلات فيها رهيبة يعني بتكون رحلتك سلسة جدًا.
معالمها؟ ما تتفوت أبدًا ! 🏛️
لندن مليانة أماكن تستحق الزيارة، وهذي بعض الوجهات اللي لازم تحطها في خطتك:
• بيغ بن وجسر برج لندن (Tower Bridge)، من أشهر المعالم اللي تخليك تحس إنك فعلًا في قلب لندن.
• قصر باكنغهام (Buckingham Palace)إذا كنت محظوظ ممكن تحضر تغيير الحرس الملكي! • كوفنت غاردن (Covent Garden)منطقة مليانة محلات، عروض شارع، وكافيهات تعيشك أجواء لندن الحقيقية.
• هايد بارك (Hyde Park)مكان مثالي وحدة من أكبر الحدائق حلو مره أنك تمشي فيها وتاخذ لك قهوة وتستمتع بجمال الحديقة.
• متحف الشمع (Madame Tussauds)لا تفوّت فرصة تصور مع نجومك المفضلين وكأنهم حقيقيين!
• عين لندن (London Eye)تجربة بانورامية تاخذك في جولة على ارتفاع خرافي تشوف فيها لندن كلها من فوق!
لا ننسى أن الخليجيين يحبون لندن! 😂🇬🇧
ما يخلون شوارع النايتسبريدج، الأوكسفورد، والبيكادلي، والسنابات شغالة على “آه يا لندن”! ولا ننسى هارودز! لازم تشيل لك شنطة خضراء تثبت إنك كنت هناك، حتى لو شريت بس شوكولاتة!
الأسواق الشعبية: تجربة فوق الخيال!
لندن مو بس ماركات فخمة وبس، فيها أسواق شعبية بتخليك تعيش تجربة مختلفة وتلقى أشياء مميزة بأسعار حلوة، ومن أشهرها:
• بورو ماركت (Borough Market)جنة عشاق الأكل، تلقى فيه كل أنواع الأكلات من حول العالم.
• كامدن ماركت (Camden Market)إذا كنت تحب الأشياء الفريدة، الملابس الغريبة، والتحف النادرة، هذا سوقك!
وإذا كانت الميزانية مفتوحة أجل لا تفوت
• هارودز (Harrods) أغلى وأشهر الماركات في العالم بتلاقيها فيه بس أنتبه على ميزانية الرحلة 😂
• سيلفردج (Selfridges) عن أي رُقي نتكلم بس؟ سوق فاخر من الأخر أرقى الماركات كلها فيه إذا حاب تدلل نفسك وتحس أنك مليونير توكل على الله وروّح.
متى تروّح لندن؟
لندن جميلة طول السنة، لكن إذا تبي أجواء معتدلة بدون زحمة سياح، فالأفضل تزورها بين أبريل ويونيو أو سبتمبر وأكتوبر. أما إذا تحب أجواء الكريسماس وترندات الخليجيين فا أنصحك لا تفوت السفر لها في ديسمبر بتكون الأجواء خيااال!😂
كم تكلف رحلة لندن؟
• السكن: فنادق 4 نجوم تبدأ من 500 ريال لليلة.
• المصاريف اليومية: الأكل والمواصلات والتسوق بحدود 600-1000 ريال يوميًا.
يعني ممكن تسوي رحلة 5 أيام بحدود 7000 إلى 10,000 ريال إذا كانت رحلتك عادية وبدون مبالغات.
لكن بصراحة؟ لندن مدينة تقدر تزورها بالمبلغ اللي تبغاه! تقدر تخليها سفرة عادية أو تروح هناك وتعيش تجربة فخمة وتسكن في أغلى الفنادق وتتسوق من هارودز، بوند ستريت، ونايتسبريدج، وهنا التكاليف بتصير مفتوحة على الآخر! فالموضوع كله يعتمد على مزاجك وكم ناوي تصرف.
